Nouerint uniuersi presentem seriem inspecturi

Nouerint uniuersi presentem seriem inspecturi quod nos, Petrus Petri, dictus prior monasterii Ecclesiole, obligamus nos et omnes priores subcesores nostros celebrare in perpetuum unam misam in onore beate uirginis uel sancti Spiritus domne Constancie Sancii, filie domni Sancii bone memorie illustris regis Portugalie, in altari quod eadem construxit in nostra ecclesia, in tota uita sua; et post mortem suam in prenominato altari misa defunctorum pro anima eius et domni Roderici Sancii, fratris sui, in perpetuum celebretur. Et hoc promittimus seruare bona fide pro bonis que monasterio nostro fecit et facitura est et pro hereditate sua de Cortegaza quam nobis contulit in presenciarum cum iure patronatus ecclesie Sancte Marine eiusdem loci, cum omnibus pertinentiis suis et cum suis defensis et terminis nouis et antiquis, ruptis et inruptis. Et nos memoratus prior hoc fecimus pro utilitate nostri monasterii ut gratiam et amorem predicte domne Constancie Sancii nostrum monasterium cunseruaret in perpetuum et haberet. Preterea nos supranominatus Petrus Petri cum consensu nostri conuentus constituimus quod omnes subcessores nostri priores adimpleant bene et fideliter hanc constitucionem quam nos fecimus in die Sancti Iuste et Rufine et eadem die missas supradictas incepimus celebrare. Quod si forte memorati subcessores nostri istam obligationem complere seu obseruare noluerint, quod non credimus fieri, incurrant maledictionem Dei Patris omnipotentis et celestis curie, et domna Constancia Sancii suum sanctum ⁽¹⁾ meritum non amittat. Facta sunt ista sub era M^a.CCC^a.II^a.