Testamentum de Nogeira de G. Odoriz

In nomine Patris et Filii et Spiritus sancti, amen. Quoniam in hac uita quasi hospites sumus et nemini nostrum ultimam sui exitus horam scire est datum et Dominus per prophetam clamat dicens: «ue uobis qui copulatis domum ad domum et agrum agro coniungitis» et cetera; et beatus Augustinus inde clamat ammonens et dicit: «diues cum dormierit nichil secum affert». Quod ego Gunsaluus Odoriz non surda aure audiens et mente cum timore retinens, iccirco fatio kartam testamenti canonice Sancti Saluatoris Ecclesiole de ipsa hereditate quam habeo in uilla Nogeira ex parte auiorum parentumque meorum. Si forte ab hoc mundo translatus fuero, quod si aliquis post me meorum filiorum illam uoluerit habitare, licentiam habitandi habeat et de omni suo labore reddat quartam partem et de fructu uinee seu arborum; et uxor mea, si post me uixerit, similiter fatiat. Si forte aliquis propinquorum meorum filiorum uel nepotum extraneorumue hoc meum factum in aliquo corrumpere uoluerit, pro sola temeritate componat ipsam hereditatem duplatam et illius melioratum; et insuper maledictus et excommunicatus et cum Juda traditore in profundum inferni sit dimersitus. Facta carta mense dezembrio, era Mª.Cª.LXXª.IIª. Ego [f. 22r] Gunsaluus Odoriz hanc testamenti seriem coram meis parentibus et aliis idoneis hominibus, sicut superius sonat, roboro et confirmo. Qui presentes fuerunt: Menendus, ts; Dauid, ts; Petrus, ts. Iohannes notuit.