Testamentum de Suario Rudriguiz

In nomine Patris et Filii et Spiritus sancti, amen. Ego Suerus ⁽¹⁾ Rodriguiz et frater meus, Micahel Rudriguiz, timentes ne morte preocupati ab hac uita intestati recederemus, facimus kartam testamenti, nos supranominati et soror nostra Materduz Rudriguiz, de hereditate quam habemus in Guitin, uidelicet quantum habemus in illa eclesia aut habere debemus cum obiectionibus suis, pro remedio animarum nostrarum, ipsi monasterio Sancti Saluatoris Ecclesiole ad diem obitus nostri. Damus et concedimus illas hereditates ubicumque illas potueritis inuenire, suis antiquis [f. 26r] determinatas terminis, et facultates quas habere potuerimus, tali pacto ut uos canonici et monasterii heredes nos adiuuetis et manuteneatis in quantum iustitia et ratio postulauerit. Quod si nos uel aliquis ex propinquis nostris seu extraneis hoc nostrum factum in aliquo corrumpere uel contempnere uoluerit, quantum auferre temptauerit in duplum componat, et domino patrie aliud tantum; et quicumque fuerit, nisi se emendauerit, sit maledictus et excommunicatus et cum Iuda traditore dampnatus. Facta karta testamenti mense martio, era Mª.Cª.LX^Lª.IIIª. Nos supradicti Suarius, Michael, Madreduz Rudriguiz, qui illam scribere iussimus, coram idoneis testibus confirmamus et propriis manibus roboramus. Qui presentes fuerunt: Pelagius, ts; Menendus, ts; Iohannes, ts. Tructesindus notuit.