Scribit Eugenius papa clero et populo infra nominatis ut obediant Lucensi episcopo

Eugenius episcopus seruus seruorum Dei. Dilectis filiis clero et populo de Lemos, de Sarria, de Flamoso, de Paramo, de utraque Neira, de Nauia, de Smirna, de Buraon, de Vallonga, de Ambiacos, de Lamba et de Asma salutem et apostolicam benedictionem. Quoniam ecclesie uestre per legatos sedis apostolice Lucensi ecclesie quondam restitute fuerant et ab Ouetensi ecclesie denuo illicete occupate, uenerabili fratri nostro Martino Ouetensi episcopo tam litteris quam uiua uoce mandauimus ut easdem ecclesias uenerabili fratri nostro Gundisaluo Lucensi episcopo cum integritate statuto termino restitueret. Qui nimirum, prout accepimus, mandatis nostris iam, sicut debuit, humiliter obediuit. Et quoniam in sede Iusticie positi omnibus suam debemus iusticiam conseruare et ecclesiarum paci et tranquillitati salubriter, auxiliante Domino, prouidere, per presentia scripta uniuersitati uestre mandamus atque precipimus quatinus fratri nostri Gundisaluo Lucensi episcopo tanquam uestro pontifici et animarum uestrarum pastori obedientiam ac reuerentiam humiliter deferatis. Datum Viterbi XVI Kalendas Aprilis.