Testamentum Auridone Suariz de Cornadelo, Draguncili, Zuenes

[f. 14r] In nomine Patris et Filii et Spiritus sancti, amen. Quoniam in hac vita quasi ospites sumus et nemini nostrum ultimam sui exitus horam scire est datum, iccirco ego, famula Dei, Aurudona Suariz, auxiliante divina gratia, iubeo disponere hereditates meas, audiens Dominum per prophetam suum dicentem: «ve vobis qui copulatis domum ad domum et agrum agro; numquid vos soli habitabitis in terra?»; et beatus Iob: «dives cum dormierit nichil secum affert; aperit occulos et nichil inveniet». Hec et alia huiuscemodi documenta sepissime audiens, timens ne ab hoc seculo intestata recedam, fatio kartam testamenti canonice Salvatoris de Eclesiola de hereditate mea propria quam habeo scilicet in villas Cornadelo et Draguncelli et Zoes. Do et testo illas in prefatas villas quantum mihi convenit ex parte meorum parentum et de mea ganantia sive de meo viro, Gunsalvo Gutieriz, quantum est in illo cautu ab integro, exceptis ubi dividet casal de Pereiru cum Zerzedo; et in Draguncelli, medietatem integram de illa quam ibi habui ex parte meorum parentum; et in Guntaldi similiter, et in Savariz medietatem integram, et de villa Cocenes, quintam partem; et Sandi meam portionem integram. Do et concedo iam predictas hereditates cum omnibus prestationibus suis per suos terminos (a) antiquos et novos determinatas, prefato monasterio ubicumque eas potuerint invenire habitatores ipsius monasterii iam predicti, pro remedio anime mee vel parentum meorum. Si forte ego vel filii mei aut propinqui seu extranei, quicumque sint, hanc meam scripturam conati infringere vel aliquod testatum (b) a me auferre aut diminuere vel contradicere voluerint, quantum dampnum fecerint, in duplum cum melioratione ipsius monasterii habitatoribus componant, et domino patrie aliud tantum et iudicatum; et qualiscumque fuerit persona, sit maledicta | [f. 14v] et excommunicata et cum Iuda traditore in inferni profundum summa dampnata. Facta karta testamenti mense marcio, era M^a. C^a. LXXX^a. III. Ego, Aurudona Suariz, cognomine Ermesinda, que illam iussi, cum idoneis testibus confirm[o] et propria manu roboro. Qui presentes fuerunt: Nunio, ts; Suarius, ts; Menendus, ts; Iohannes notuit.