Ecclesia Sancti Saluatoris de Ecclesiola suscepta in beati Petri protectione

Innocentius episcopus, seruus seruorum Dei, dilecto filio Tructesindo, priori ecclesie ⁽¹⁾ Sancti Saluatoris de Ecclesiola, eiusque successoribus regulariter substituendis in perpetuum.
Sicut iniusta poscentibus nullus est tribuendus assensus, ita iusta postulantium non est differenda petitio. Ea propter, dilecte in Domino fili, Tructesinde prior, tuis petitionibus ⁽²⁾ clementer annuimus et ecclesiam Sancti Saluatoris de Ecclesiola sub censu annuo duorum morabitinorum in beati Petri protectione ac nostra suscipimus et presentis priuilegii pagina communimus, statuentes ut quascumque possesiones, quecumque bona eadem ecclesia in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis, Deo propitio, poterit adipisci, firma tibi tuisque successoribus et illibata permaneant. In quibus hec propriis duximus exprimenda uocabulis: ecclesiam Sancti Martini de Dragoncelli, ecclesiam Sancti Saluatoris de Petrosino, ecclesiam Sancti Mametis de Cerzedo cum suis heredibus atque parrochianis; reditus omnes et heredes quos idem locus habet uel ei obuenerint ⁽³⁾ et quicquid possidet intra hos fines uidelicet per montem Auturelo, inde per stratam mauriscam ad fontem Atequi et inde per illam stratam sicut uadit ad Scillatam et inde per fontanum ad fornum tegularium et sicuti diuidetur per agrum de Rebelles et sicut uadit inter Sauariz et Cornadelo et quomodo uadit per portum Burgarium et inde per terminum de Cornadelo et campum de Cerzedo et uadit per illam stratam de Sancto Petro de Campo, inde quomodo strema Guetin et Forozos cum Ecclesiola et inde peruenit ad riuulum Rugitorium et inde usque ad montem Auturolo, sicut Tharasia regina, Adefonsi gloriose memorie regis filia, eidem ecclesie Sancti Saluatoris de Ecclesiola intuitu deuotionis noscitur obtulisse et filius eius Ildefonsus postea confirmauit; libertatem quoque quam Geluira Nuniz cum uniuersis coheredibus suis eidem loco fecit, ratam et firmam perpetuo manere sanccimus. Adicimus etiam ut prefata ecclesia Sancti Saluatoris de Ecclesiola ab omni episcopali debito et exactione siue ordinatione [f. 1v] ut uidelicet, nisi rogatus fuerit a priore, nichil liceat episcopo ibidem facere uel ordinare et ab omnibus eclesiasticis condicionibus seu secularibus libera permaneat, quemadmodum uenerabilis frater noster Iohannes, portugalensis ecclesie episcopus, statuit et, bracharensis ecclesie archiepiscopus factus postea, confirmauit. Obeunte uero te, nunc eiusdem loci priore, uel tuorum quolibet successorum, nulius ibi qualibet subreptionis astutia uel uiolentia proponatur, nisi quem fratres communi consensu uel fratrum pars consilii sanioris secundum Dei timorem et regulam sancti Augustini elegerint. Sepulturam quoque eiusdem loci liberam esse concedimus ut uidelicet quicumque se illic sepeliri deliberauint eorum deuotioni et extreme uoluntati, nisi forte excommunicati sint, nullus obsistat, saluo nimirum iure matricis ecclesie. Concedimus etiam ut, si in tota terra offitium ab episcopo fuerit interdictum, in eodem loco et in supradictis ecclesiis officium licenter clausis ianuis peragatur. Decernimus ut nulli omnino hominum liceat eundem locum super hac nostra confirmatione temere perturbare aut eius possesiones auferre uel ablatas retinere, minuere sed omnia integre conseruentur eorum pro quorum sustentatione ac gubernatione concessa sunt omnimodis usibus pro futura. Si qua sane in posterum ecclesiastica secularisue persona huius nostre constitutionis paginam sciens, contra eam temere uenire temptauerit, secundo tertioue commonita, si non congrua emendatione satisfecerit, potestatis honorisque ⁽⁴⁾ sui dignitate careat reamque se diuino iuditio existere de perpetrata iniquitate cognoscat et a sacratissimo corpore ac sanguine Dei ac Domini redemptoris nostri Ihesu Christi aliena fiat. Cunctis autem eidem loco sua iura seruantibus sit pax Domini nostri Ihesu Christi quatenus hic fructum bone actionis percipiant et in futuro premia eterne pacis inueniant. Amen. Amen.
Ego Innocentius, catholice Ecclesie episcopus, SS. Data Lat. per manum Aimerici, sancte romane Ecclesie diaconi cardinalis et cancellarii, V kalendas maii, indictione III, dominice Incarnationis anno M°.C°.XXX.VIIII., pontificatus domni Innocentii pape II anno X. Signum