Ecclesia Sancti Saluatoris de Ecclesiola sub beati Petri protectione suscepta

[f. 2r] Lucius episcopus, seruus seruorum Dei, dilectis filiis Tructesindo priori ecclesie Sancti Saluatoris de Ecclesiola ⁽¹⁾ eiusque fratribus tam presentibus quam futuris regularem uitam professis in perpetuum.
Apostolici moderaminis clemencie conuenit religiosos diligere et eorum loca pia protectione munire: dignum namque et honestati conueniens esse cognoscitur ut qui ad ecclesiarum regimen assumpti sumus eas et a prauorum hominum nequitia tueamur et apostolice sedis patrocinio foueamus. Eapropter, dilecti in Domino filii, uenerabilis fratris nostri Iohannis, bracharensis archiepiscopus, precibus inclinati, uestris iustis postulationibus clementer annuimus et prefatam ecclesiam in qua diuino mancipati estis obsequio, sub beati Petri et nostra protectione suscipimus et presentis scripti priuilegio communimus, statuentes ut quascumque possessiones, quecumque bona eadem ecclesia in presentiarum iuste et canonice possidet, aut in futurum concessione pontificum, largitione regum uel principum, oblatione fidelium, seu aliis iustis modis, Deo propitio, poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis: ecclesiam Sancti Martini de Dragoncelli, ecclesiam Sancti Saluatoris de Petrosino, ecclesiam Sancti Mametis de Cerzedo cum pertinentiis suis, ecclesiam Sancti Martini de Trauanca, ecclesiam Sancti Michaelis de Trauazolo cum suis pertinentiis, quicquid eadem Ecclesiola possidet intra suos fines, sicut Tharasia regina, Adefonsi gloriose memorie regis filia, eidem ecclesie Sancti Saluatoris de Ecclesiola intuitu deuotionis noscitur obtulisse et filius eius, Ildefonsus, postea confirmauit; liber tatem quoque quam Geluira Nuniz cum uniuersis coheredibus suis eidem loco fecit, ratam et firmam perpetuo manere sanccimus. Adicimus etiam ut prefata ecclesia Sancti Saluatoris de Ecclesiola ab omni episcopali debito et exactione siue ordinatione, ut uidelicet, nisi rogatus fuerit a priore, nichil liceat episcopo ibidem facere uel ordinare, et ab omnibus ecclesiasticis conditionibus seu secularibus libera permaneat, quemadmodum frater noster uenerabilis Iohannes, portugalensis ecclesie episcopus statuit et, bracharensis ecclesie archiepiscopus factus postea, confirmauit. Sane laborum uestrorum quos propriis manibus aut sumptibus colitis siue de nutrimentis uestrorum animalium, nullus clericus uel laicus decimas a uobis exigere presumat. Prohibemus quoque ut nulli fratrum post factam professionem absque prioris totiusque congregationis permissione liceat ex eodem claustro discedere; discedentem uero absque communium litterarum cautione nullus audeat retinere. Crisma uero, oleum sanctum, consecrationes altarium seu baselicarum, ordinationes clericorum qui ad sacros ordines fuerint [f. 2v] promouendi, a diocesano suscipiatis episcopo, siquidem catholicus fuerit et gratiam atque communionem sedis apostolice habuerït et ea gratis et absque aliqua prauitate uobis uoluerit exhibere; alioquin liceat uobis catholicum quemcumque malueritis adire antistitem qui nimirum nostra fultus auctoritate quod postulatur indulgeat. Obeunte uero te, nunc eiusdem loci priore, uel tuorum quolibet successorum, nullus ibi qualibet surreptionis astutia uel uiolentia preponatur, nisi quem fratres communi consensu uel fratrum pars consilii sanioris secundum Dei timorem et regulam sancti Augustini elegerint. Sepulturam quoque eiusdem liberam esse concedimus ut uidelicet quicumque se sepeliri illic deliberauerint, eorum deuotioni et extreme uoluntati, nisi forte excommunicati sint, nullus obsistat, saluo nimirum iure matricis ecclesie. Concedimus etiam ut, si in tota terra offitium ab episcopo interdictum fuerit, in eodem loco et supradictis ecclesiis offitium licenter clausis ianuis peragatur. Ad inditium autem huius a romana Ecclesia percepte libertatis duos morabitinos annis singulis nobis nostrisque successoribus persoluetis. Decernimus ergo ut nulli omnino hominum liceat prefatam ecclesiam temere perturbare aut eius possesiones auferre uel ablatas retinere, minuere, aut aliquibus uexationibus fatigare, sed omnia integra conseruentur eorum pro quorum gubernatione et sustentatione concessa sunt usibus omnimodis ⁽²⁾ pro futura, salua in omnibus apostolice sedis auctoritate. Si qua igitur in futurum ecclesiastica secularisue persona, hanc nostre constitutionis paginam sciens, contra eam temere uenire temptauerit, secundo tertioue commonita, si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine Dei et Domini redemptoris nostri Ihesu Christi aliena fiat atque in extremo iudicio uel examine districte ultioni subiaceat. Cunctis autem eidem loco iusta seruantibus sit pax Domini nostri Ihesu Christi quatenus et hic fructum bone actionis percipiant et aput districtum iudicem premia eterne pacis inueniant. Amen. Amen. Amen.
Ego Lucius, catholice Ecclesie episcopus, SS 3.
† Ego Conradus, sabiniensis episcopus, SS.
† Ego Gregorius, cardinalis diaconus Sanctorum Sergii et Bachi, SS.
† Ego Theowinus, Sancte Rufine episcopus, SS.
† Ego Albericus, hostiensis episcopus, SS.
Ego Otto, diaconus cardinalis Sancti Georgii ad uelum aureum, SS.
Ego Guido, diaconus cardinalis Sanctorum Cosme et Damiani, SS.
† Petrus, diaconus cardinalis Sancte Marie in Porticu, SS.
† Thomas, presbiter Vestine, SS.
† Ego Ubaldus, presbiter cardinalis tituli Praxedis, SS.
Ego Astaldus, diaconus cardinalis Sancti Eustachii iusta templum Agrippie, SS.
Datum Lat. per manum Baronis, capellani et scriptoris, II kalendas maii, indictione VII°, Incar [f. 3r] nationis dominice anno M°.C°.XL°IIII°, pontificatus uero domni Lucii sedis pape, anno Iº [Signum]