Ecclesia Sancti Saluatoris de Ecclesiola sub beati Petri protectione suscepta

Eugenius episcopus, seruus seruorum Dei, dilectis filiis Tructesindo, priori ecclesie Sancti Saluatoris de Ecclesiola eiusque fratribus tam presentibus quam futuris regularem ⁽¹⁾ uitam professis in perpetuum.
Religiosis desideriis dignum est facilem prebere consensum ut fidelis deuotio celerem sortiatur effectum. Quo circa, dilecti in Domino filii, uestris iustis postulationibus, predecessorum nostrorum felicis memorie pape Innocentii, Lucii uestigiis inherentes, clementer annuimus et prefatam ecclesiam in qua diuino mancipati estis obsequio sub beati Petri et nostra protectione suscipimus et presentis scripti priuilegio communimus, statuentes ut quascumque possesiones quecumque bona eadem ecclesia in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis, prestante Domino, poterit adipisci, firma uobis uestrisque successoribus et illibata permaneant. In quibus hec propriis duximus nominibus annotanda: ecclesiam Sancti Martini de Dragoncelli, ecclesiam Sancti Saluatoris de Petrosino, ecclesiam Sancti Mametis de Cerzedo cum pertinentiis suis, ecclesiam Sancti Martini de Trauanca, ecclesiam Sancti Michaelis de Trauazolo cum pertinentiis suis; quicquid eadem Ecclesiola possidet intra suos fines, sicut Tharasia regina, Adefonsi gloriose memorie regis filia, eidem ecclesie Sancti Saluatoris de Eclesiola intuitu deuotionis noscitur obtulisse, et filius eius, Ildefonsus, postea confirmauit. Libertatem quoque quam Geluira Nuniz cum uniuersis coheredibus suis eidem loco fecit, ratam et firmam perpetuo manere sanccimus. Adicimus etiam ut prefatam ecclesiam Sancti Saluatoris de Eclesiola ab omni episcopali debito et exactione siue ordinatione, ut uidelicet, nisi rogatus fuerit a priore, nichil liceat episcopo ibidem facere uel ordinare [f. 3v], et ab omnibus ecclesiasticis conditionibus seu secularibus libera permaneat, quemadmodum uenerabilis frater noster Iohannes, portugalensis ecclesie episcopus, statuit et, bracharensis ecclesie archiepiscopus postea factus, confirmauit. Sane laborum uestrorum quos propriis manibus aut sumptibus colitis siue de nutrimentis uestrorum animalium, nullus omnino clericus uel laicus decimas exigere presumat. Prohibemus quoque ut nulli fra¬trum post facta professione absque prioris totiusque congregationis permissionis ⁽²⁾ liceat ex eodem claustro discedere; discedente uero absque communium litterarum cautione, nullus audeat retinere. Crisma uero, oleum sanctum, consecrationes altarium seu baselicarum, ordinationes clericorum qui ad ordinationes ⁽³⁾ fuerint sacros promouendi, a diocesano suscipiatis, siquidem catholicus fuerit et gratiam atque communionem sedis apostolice habuerit et ea gratis et absque aliqua prauitatis uobis uoluerit exhibere; alioquin liceat uobis catholicum quemcumque malueritis adire antistitem, qui nimirum nostra fultus auctoritate quod postulatur indulgeat. Obeunte uero te, nunc eiusdem loci priore, uel tuorum quolibet successorum, nullus ibi qualibet surrectionis ⁽⁴⁾ astutia seu uiolentia preponatur, nisi quem fratribus communi consensu uel fratrum pars consilii sanioris secundum Dei timorem et regulam Sancti Augustini elegerint. Sepulturam ⁽⁵⁾ quoque eiusdem loci liberam esse concedimus ut uidelicet quicumque se illic sepeliri deliberauerit ⁽⁶⁾ eorum deuotioni et extreme uoluntati, nisi forte excommunicati sint, nullus obsistat, saluo nimirum iure matricis ecclesie. Con¬cedimus etiam ut si in tota terra offitium ab episcopo interdictum fuerit, in eodem loco et supradictis ecclesiis offitium licenter clausis ianuis peragatur. Ad indicium autem huius a romana Ecclesia percepte libertatis, II^os morabitinos nobis nostrisque successoribus annis singulis persoluetis. Decernimus ergo ut nulli omnino hominum liceat prefatam ecclesiam temere perturbare aut eius possesiones auferre uel ablatas retinere seu aliquibus uexationibus fatigare; sed omnia integra conseruentur eorum pro quorum gubernatione et sustentatione concessa sunt usibus omnimodis pro futura, salua in omni¬bus apostolice sedis auctoritate. Si qua igitur futurum ecclesiastica secularisue persona, hanc nostre constitutionis paginam sciens, contra eam temere uenire temptauerit, secundo tercioue commonita, si non satisfactione congrua emendauerit, potestatis hono¬risque sui dignitate careat reamque de ⁽⁷⁾ diuino iuditio existere de perpetrata iniqui¬tate se cognoscat et a sacratissimo corpore ac [f. 4r] sanguine Dei et Domini redemp¬toris nostri Ihesu Christi aliena fiat atque in extremo examine districte ultioni subia¬ceat; cunctis autem eidem loco sua iura seruantibus sit pax Domini nostri Ihesu Christi quatinus et hic fructum bone actionis percipiant et apud districtum iudicem premia eterne pacis inueniat. Amen, Amen, Amen.
† Ego Hubaldus, presbiter cardinalis Sancte Praxedis, SS.
† Ego Hubaldus, presbiter cardinalis tituli S. Iohannis et Pauli, SS.
† Ego Aribertus, presbiter cardinalis tituli Sancti Marcelli, SS.
† Ego Iulius, presbiter cardinalis tituli Sancti Marcelli, SS.
† Ego Guido, presbiter cardinalis tituli Pastoris, SS.
† Ego Iordanis, presbiter cardinalis tituli Sancte Susanne, SS.
† Ego Eugenius, catholice episcopus, SS.
† Ego Oddo diaconus cardinalis Sancti Nico Georgii ad uelum aurerum, SS.
† Ego Octauianus, diaconus cardinalis Sancti Nicolai in carcere tulliano, SS.
† Ego Gregorius, diaconus cardinalis Sancti Angeli, SS.
† Ego Iohannes, diaconus cardinalis Sancte Marie Noue, SS.
† Ego Guido, diaconus ⁽⁸⁾ cardinalis Sancte Marie in Porticu, SS.
Datum Brixide per manum Guidonis, sancte romane Ecclesie diaconi cardinalis et cancellarii, VI idus septembris, indictione XI, Incarnationis dominice anno M°. C°. XL.VIII°, pontificatus uero domni Eugenii pape III anno quarto. Signum.