Testamentum

In nomine Patris et Filii et Spiritus sancti, amen. Quoniam nemini mortalium exitus sui horam est datum scire, sicut beatus Iob dicit quam ignota est uia uiro: nescit namque unde ueniat et quo pergit penitus ignorat. Ideo ego Menendus Diaz et uxor mea Adosinda Ordoniz, timentes orribilem nostri obitus diem, facimus cartam testamenti ecclesie Sancti Saluatoris de Ecclesiola, de hereditate nostra propria quam habemus in uilla Tarauquela, subtus monte Grande, discurrente Fermuza, prope littus maris, territorio portugalensi ⁽¹⁾. Damus et testamus in uilla [f. 27v] predicta hereditatem quantam ibi habemus seu habuerimus, pro remedio anime nostre, prefato monasterio ubicumque potuerit inueniri, suis antiquis determinatam terminis ⁽²⁾. Damus et concedimus iamdictam hereditatem tali pacto ut unus ex nobis iamdictis qui superuixerit habeat illam in uita sua et post mortem suam relinquat illam integram et ab omni inpedimento liberam iamdicto monasterio cum omnibus prestimoniis suis in perpetuum. Quod si forte, quod minime credimus, nos ipsi uel alia quecumque persona propinqua seu extranea hoc factum nostrum corrumpere uoluerit, quantum auferre temptauerit cum melioratu suo in duplo componat, et domino patrie aliud tantum; et quicumque fuerit, sit maledictus et excommunicatus et a corpore et sanguine Domini nostri Ihesu Christi separatus et cum Iuda traditore penis perpetuis traditus. Facta karta testamenti mense nouembrio, era Mª.Cª.LXXXª.IIª. Ego Menendus Diaz et uxor mea Adosinda, qui hanc seriem testamenti scribere iussimus, coram idoneis testibus confirmamus et propriis manibus roboramus. Qui presentes fuerunt: Petrus, ts; Gunsaluus, ts; Suerus, ts. Didacus, presbiter, notuit.