Karta de Figueira

In nomine Patris et Filii et Spiritus sancti, amen. Quoniam presentis temporis uite incertus est finis et unusquisque christianus ab ipso Domino nostro Ihesu Christo docetur non dormire sed ut uigilet, unde beatus Augustinus ⁽¹⁾ clamat et dicit: «Diues cum dormierit nichil secum affert», iccirco ego Pelagio Muniz et uxor mea Eluira Odoriz facimus cartam testamenti canonice Sancti Saluatoris Ecclesiole, de hereditate nostra quam habemus in uilla Figeira, uidelicet de illa que fuit de Gunsaluo Venegas et illius parentum, scilicet Egee Zalamiz et Adosinde Odoriz, de medietatem sextam integram; et insuper in Vistelanes unum agrum in longum passales et in amplum quod adquisiuimus de Sancto Felice ubi erat offertum pro anima supradicti Gunsalui, pro quo dedimus pretium XII modios; et de hereditate que fuit de Pelagio Zalamiz et uxoris sue Sidi Diaz, octauam integram. Damus et concedimus prout retro consonat ipsas hereditates prescripto loco Sancti Saluatoris, pro animarum nostrarum remedio ad diem mortis nostre, ita ut qui ex nobis prius obierit prius suam partem relinquat liberam, et alter idem fatiat, accedente illius finis termino [f. 29r]. Quod si aliquis forte ex nostris parentibus ⁽²⁾ aut ex filiis uel extraneis hoc nostrum factum in aliquo corumpere uoluerit uel infringere, pro sola temeritate ipsam hereditatem cum suo melioratu componat duplatam, et domino terre aliud tantum et iudicatum; et insuper maledictus et excommunicatus sit et cum Iuda traditore in profundum inferni dimersus. Facta carta testamenti VIIº Xº kal. februarii, era Mª.C.LXXXª.IIIIª. Ego, Pelagius Moniz et uxor mea Eluira Odoriz, qui illam scribere fecimus, coram idoneis testibus manibus propriis roborando confirmamus. Qui presentes fuerunt: Menendus, ts; Petrus, ts; Iohannes, ts. Pelagius notuit.