Testamentum de Sancta Maria de Varzena et S. Iacobo de Matu

In nomine Patris et Filii et Spiritus sancti, amen. Ego Suerius Suariz, timens hinc non bene exire, nulli etenim horam sui obtitus scire prestitum est, unde Dominus discipulis suis interrogantibus de tempore ⁽¹⁾ natura dixit: «non est uestrum nosse tempora uel momenta que pater posuit in sua potestate», patri potestatem non discipuit condonans. Quapropter, antequam inopinata mors atque ineuitabilis incumbat, gratia nostri redemptoris preueniente, fatio cartam testamenti uobis priori dompno Tructesindo ceterisque canonicis Ecclesiole de hereditatibus et facultatibus meis quascumque habeo uel in diem mee mortis habere potuero. Ad presens uero do uobis omne illud quod iure hereditario habeo uel habere debeo in ecclesia Sancte Marie de Varzena et in ecclesia Sancti Iacobi de Matu; et insuper concedo et testo corpus meum uestro monasterio ut ibi illud sepeliatis; et si absque legitimo semine mortuus fuero, omne quod habuero hereditatis et facultatis uobis ab integro et absque impedimento mando et concedo; si uero filium ex legitima uxore I^um uel II^os uel usque V^e filios habuero, equalem uobis partem unius filii concedo; quod si amplius quinque filios mihi Deus dederit, quintam partem uobis concedo integram. Et hoc fatio pro remedio anime mee et ut me uos adiuuetis et manuteneatis in quantum iustitia et ratio postulauerit. Si uero ego uel alius aliquis meorum propinquorum uel extraneorum hoc meum factum in aliquo corrumpere aut disturbare uoluerit, quantum auferre temptare uoluerit in duplo componat, et domino terre aliud tantum. Et qualiscumque persona fuerit, nisi satisfacere festinauerit, sit maledicta et excommunicata et cum Iuda traditore in profundum inferni dimersa. Facta carta testamenti II kalendarum augusti, era Mª.Cª.LXXXª.VIIIª. Ego Suerius Suariz, qui hanc kartam scribere iussi, coram idoneis testibus propria manu roboro et confirmo. Qui presentes fuerunt: Petrus, ts; Pelagius, ts; Didacus, ts. Menendus notuit.