Testamentum

In nomine Patris et Filii et Spiritus sancti, amen. Ego, famulus Dei, Rudrigu Gunsaluiz, et uxor mea Maria, metuentes diem iuditii et cupientes esse participes regni Dei, facimus cartam testamenti canonice Sancti Saluatoris Ecclesiole de omni nostra hereditate quam habemus, pro tolerantia canonicorum uel quorumlibet ordinum ibi habitantium et in uita bona perseuerantium, tali conuennientia ut ille qui superuixerit de nobis habeat illam dum uixerit; mortuo uero, relinquat illam ipso monasterio absque ulla ocasione. Hoc facto, uidelicet nobis morte consumptis, si aliquis de semine nostro in illa habitare proposuerit, licitum esse ei tali coniectione concedimus ⁽¹⁾ ut de fructu illius quartam partem persoluat uel reddat ad predictum sanctum locum. Si uero aliquis seu nos seu de nostris propinquis uel de extraneis, quicumque fuerit, uenerit hoc nostrum factum inrumpere uel infringere, confringat illum omnipotens Deus et sit excommunicatus et a sacratissimo corpore et sanguine Domini nostri Ihesu Christi separatus et in obscurissimo inferni profundo perpetualiter dimersus. Et pro dampno quod fecerit, componat canonicis illam omnem hereditatem cum suo melioratu duplatam, et ipsam terram dominanti unam libram auri purissimi et iudicatum. Karta uero obtineat suum robur. Facta carta IIIº idus iunii, era Mª.Cª.LXXª.Iª. Ego Rudericus et uxor mea Maria, qui illam iussimus scribere, manibus propriis roboramus. Qui presentes fuerunt: Didacus, ts; Menendus, ts; Suarius, ts. Petrus, presbiter, notuit.

EXPLICIT DE TESTAMENTIS