Karta et Testamentum de Ero Suariz

In nomine Patris et Filii et Spiritus sancti, amen. Quoniam in hac uita quasi ospites sumus et nemini nostrum ultimam sui oram est datum, iccirco ego Erus Suariz, timens ne morte preocupatus ab hac uita intestatus recedam, lubeo meas facultates disponere, diuina auxiliante gratia. Dominum etenim per prophetam audiui dicentem: «ue uobis qui copulatis domum ad domum et agrum agro; numquid uos soli habitabitis super terram?»; unde beatus Augustinus: «diues cum dormierit nichil secum affert; aperit occulos et nichil inueniet». Hec et alia huiuscemodi documenta sepissime audiens, facio kartam testamenti ipsi canonice Sancti Saluatoris de Ecclesiola de mea hereditate, uidelicet mediam partem integram de ipsa uilla de Laureru, et unum casal in uilla Zoenes in ripa, pro remedio anime mee parentumque meorum. Ita do et concedo ipsas hereditates prout sursum sonat ut ab hac die et tempore sit in potestate ipsorum canonicorum ibidem Domino Ihesu Christo seruientium in perpetuum. Si uero aliquis ex meis parentibus uel extraneis hoc meum factum in aliquo corrumpere uel minuere uel disturbare uoluerit, quisquis fuerit, pro sola temeritate componat ipsam hereditatem duplatam cum suo melioratu ipsis canonicis, et regie potestati aliud tantum et iudicatum; et insuper sit excommunicatus et cum Iuda traditore in inferno dampnatus. Facta ⁽¹⁾ karta testamenti mense februarii, era M.C.LXX.II. Ego prefatus Erus Suaris, qui illud scribere iussi, propriis roboro manibus et confirmo. Qui presentes fuerunt et uiderunt: Dauid presbiter uidit; Gunsaluus presbiter uidit; Petrus, ts; Suarius, ts; Ramirus, ts; Saluator, ts; Didacus, ts. Petrus notuit.