De Mereli

[f. 26r] In Dei nomine. Ego Orraca Arie una cum filiis meis et nepotibus et omnis uox mea do et concedo Deo et monasterio Sancte Marie de Fenalibus et uobis domno Gundisaluo abbati eiusdem monasterii conuentuique uestro illud meum casale de Merelli quod iacet inter ipsam uestram searam et riuum Minei. Et do eum cum omnibus suis directuris et bonis intus et extra, montibus, fontibus, agris, arboribus, casis, pratis, pascuis, exitibus et regressibus, excepto ripario. Do eum uobis, scilicet casale predictum, quapropter ego tenui de uobis aliud uestrum casale ex multo tempore cum omni lucro suo et pro anima mea et mariti mei et filiorum meorum et ut participes sinus omnium beneficiorum que in eodem monasterio fiunt et facienda erunt in oratione usque in finem. Sed rogo uos ut ego teneam eum de manu uestra in uita mea tantum et dabo inde uobis annuatim pro agnitione unam | [f. 26v] fugazam cum sua directura in festiuitate Assumptionis sancte Marie. Post mortem uero meam recipiatis predictum casale quale eum inueneritis, cum omni fructu suo et populatione, et habeatis eum et possideatis iure hereditario in perpetuum absque ulla interdictione et diminutione. Et si aliquis homo ex parte mea uel ab extranea hanc cartam et contra hoc meum uoluntarium factum ad irrumpendum uenerit uel ego uenero, quisquis fuerit, in primis sit maledictus et excommunicatus et cum Anna et Caypha et Pontio Pilato et Herode, rege iniquo, et Iuda, Domini traditore, in inferno dampnatus et insuper regie uoci mille morabitinos pectet et hec carta maneat semper in robore. Facta carta donationis et testamenti sub era Mª CCª Lª VIIIIª et quotum VI° kalendas ianuarii, regnante rege Alfonso in Portugali, episcopo Stephano regente ecclesiam Tudensem, tenente Ualadares domno Laurentio Suariz, maiorinis Pelagio Gago et fratre suo, iudicibus in Melgazo Pelagio Garsie et Ruderico Menendi. Ego Orraca Arie iam dicta in hanc cartam manus meas roboro. Inter cetera dico et pono firmiter quod si (a) aliquis homo contra hanc cartam ad irrumpendum uenerit, ut supra dictum est, pariat uobis ipsam hereditatem duplatam uel triplatam. Et ego Iohannes Aluari et Maior Aluari cum filiis nostris propriis manibus hanc cartam manus nostras roboramus.
Qui presentes fuerunt: Didacus Diaz monachus de Melone testis, Iohannes Iohannis monachus de Melone testis, Petrus Martini prior de Fenalibus testis, Nuno Aluari conuersus de Fenalibus testis, Petrus Ruderici monachus de Melone testis, Iohannino monachus de Fenalibus testis, Martinus Aluiti notarius concilii Ripe Auie qui notuit (signum).