De decimis de Figueiredo

[f. 47v] De decimis de Figueiredo. |

[f. 48r] Stephanus Dei gratia Tudensis episcopus omnibus presens placitum inspecturis salutem in Domino. Nouerint presentes et posteri quod cum causa uerteretur inter abbatem domnum Iohannem et conuentum monasterii de Fenalibus ex una parte et domnum Thomam prelatum ecclesie Sancti Michaelis de Messegaes et heredes ipsius ecclesie ex alia super decimis de Figueiredo, quas ipse prelatus asserebat ad predictam ecclesiam de Messegaes pertinere, tandem ipsi in nostra presentia constituti, ex beneplacito utriusque partis, ad talem deuenerunt compositionem, uidelicet quod abbas et conuentus de Fenalibus reddant in perpetuum ecclesie de Messegaes in festo Sancti Martini annuatim II^os modios de uino et unum modium de milio uel de annona; addimus etiam quod supradictus abbas domnus Iohannes cum suo conuentu tradidit domino Thome, prelato de Messegaes, et ecclesie sue in concambium duas leiras hereditatis que adiacent super Fontanelo; et ipse donnus Tome concessit predicto monasterio in secula seculorum alias duas leyras infra circulum de Figueiredo coram nobis. Quod ut ratum permaneat et stabile perseueret, nos litterarum nostrarum testimonio et sigilli nostri munimine (a) fecimus confirmari, excommunicantes omnes illos qui contra hoc nostrum placitum uenire presumpserint. Actum est hoc apud Uluariam, in mense februarii, era Mª CCª LXXª Iª, regnante in Legione et in Castella rege domino Fernando, regnante in Portugalia rege domino Santio, principe terre domino Martino Egidii.
Qui presentes fuerunt: Iohannes Garsie canonicus, Gonsaluus Laurentii capellanus episcopi, Iohannes Garsie miles, Menendus Nuni de Tex, Petrus monachus, prelatus de Benuiuer, confirmant.
Petrus Martini prelatus de Chauaes, frater Gundisaluus de Feaes, Martinus Alfonsi monacus de Sancto Iohanne de Longouares [testes].
Petrus testis, Pelagius testis, Iohannes testis.
Alfonsus Nuni, notarius episcopi, qui notuit.