De Salzedelo

[f. 57v] In nomine sancte et indiuidue Trinitatis. Amen. Notum sit omnibus hominibus presentem paginam inspecturis quod ego Laurentius Menendi fatio cartam uenditionis de hereditate mea propria quam habeo ex parte patris mei et fratris mei Gemecii Menendi, quam dedit mihi ad obitum suum, uobis Reimundo Iohanis et uxori uestre et sorori mee Marie Menendi de uno casali quod habeo in loco qui dicitur Salzedelo et nominatur Aluares et aliud casale in loco qui dicitur de Petra et habet iacentia ad portam Sancti Iacobis de Pias. Do uobis ipsas hereditates cum omnibus pertinenciis suis et intratibus et exitibus pro precio quod de uobis accepi, scilicet mille et CCCC^os et XXXª soldos et in robore unum bulsum de uino, quod tantum mihi et uobis | [f. 58r] bene conplacuit et de precio nichil remansit in debito pro dare. Igitur de hac die habeatis uos ipsas hereditates et omnis uox uestra et faciatis de ea quicquid placuerit uobis imperpetuum. Si aliquis homo uenerit uel uenero qui hanc cartam uoluerit frangere, quantum quesierit tantum uobis in duplo componat et habeat maledictionem Dei patris omnipotentis et meam et anatema sit et insuper apono ibi penam quod per dominum terre compellatur, cui uocem uestram dederitis, quingentos aureos et ut hoc factum meum semper robut obtineat imperpetuum. Facta carta uenditionis IIII° kalendas augusti, sub era Mª CCª XXXª VIIIIª, regnante in Portugalia rege domno Alfonso, episcopo Tudensi domno Stephano, tenente terram domno Suerio Pelagii, iudex in Pena Regine Alfonsus, uicario terre Pelagio Gago. Ego Laurentius Menendi hanc cartam roboro et confirmo.
Qui presentes fuerunt: Petrus testis, Alfonsus testis.
Martinus testis, Rudericus testis (signum).