De Seela

[f. 82v] In nomine sancte et indiuidue Trinitatis. Amen. Notum sit omnibus hominibus tam presentibus quam futuris quod ego Maria Pelagii, cuius sum filia Pelagii Sudarii, ob remedium anime mee do in presenti monasterio de Feaes meam hereditatem propriam quam habeo in Sancta Marina de Seela iuxta castellum Sancti Martini. Do et concedo ei quantum habeo in ipsa uilla cum suis intratibus et exitibus, montibus et fontibus, uallibus et domibus et cum totis suis | [f. 83r] terminis. Do et concedo eam in honore beate Marie de Fenalibus pro remedio anime mee et parentum meorum et anime omnium fidelium defunctorum per manus domni Didaci abbatis et conuentus et capituli. Si aliquis homo uenerit uel uenero qui hanc donationem meam uoluerit frangere, sit maledictus et excommunicatus usque ad VII generationem et cum Iuda, traditore Domini, in inferno sit condempnatus et insuper domino terre, uel cui uocem uestram dederitis, CCCC aureos exsoluat et carta maneat in suo roìbore. Facta carta donationis sub era Mª CCª Lª Vª, mense martii, regnante rege Alfonso in Legione, in sede Tudensi episcopus Iohannes, tenente Toronium Nunus Nuni, tenente castellum Sancti Martini Fernandus Menendi (a). Ego Maria Pelagii, que hanc cartam fieri iussi, propriis manibus eam roboro et confirmo, tali conditione quod postquam opera fuerit consumata reddant semper annuatim ad totum conuentum unam pitantiam de ista hereditate in uespera ramis palmarum ob remedium anime mee et habeant me in mente in suis orationibus.
Qui uiderunt et audierunt: Petrus testis, Iohannes testis, Fernandus testis.
Petrus Martini scriptor qui notuit.