De Fragoso in Uilar de Mar

[f. 89r] In Dei nomine. Notum sit omnibus tam presentibus quam futuris quod ego Menendus Roderici et uxor mea Terasia Pelagii damus in presenti et concedimus monasterio et conuentui de Fenalibus ob remedium animarum nostrarum medietatem unius casalis in Fragoso in uilla nominata Uilar de Mar, tali uidelicet conditione ut de prouentibus ipsius hereditatis faciant segari panem in tempore messium ita quod monachi non liceat ire illuc causa secationis, sed celebrent missas more solito et obseruent ordinem suum. Si quis contra hanc donationem nostram uenerit, pariat uoci monasterii C aureos, carta nichilominus robur obtineat. Facta donatione sub era Mª CCª LXXXª Iª, XVIIº kalendas iulii, regnante rege domno Fernando in Castella et in Legione, in sede Sancti Iacobi domno Iohanne archiepiscopo et pertigarius eius Cornelon. Nos, qui hanc cartam iussimus facere, manus nostras proprias roboramus.
Qui presentes fuerunt, uiderunt et audierunt: Petrus Menendi filius eius, Munio Petri prelatus ecclesie Sancti Andree de Comesandi, Fernandus Anga miles, Petrus Petri maiordomus domni Menendi, | [f. 89v] domnus Petrus Martini monacus de Fenalibus, Michael Fernandi.
Pelagius Roderici monacus qui notuit (signum).