De cauto monasterii et de Rumpicinlla

[f. 100v] In Dei nomine. Amen. Era Mª CCª LXXXª Iª, VII° idus iunii. Quum ea que in presenti fiunt more labentis aque cum ipsis seculis dilabuntur nisi scripture testimonio roborentur, iccirco per hoc scriptum imperpetuum ualiturum sit omnibus notum quod cum domnus Iohannes abbas de Fenalibus et conuentus eiusdem, Ordinis Cisterciensis, in hereditatibus siue grangiis suis constituerent populationes laicales in cauto predicti monasterii et in Rumpecilla, in diocesi Tudensi, domnus Luchas episcopus Tudensis, de consensu Petri Menendi decani et capituli eiusdem et Iohannis Garsie canonici tenentis archidiaconatum de Ualadares, peciit ab eis in una | [f. 101r] illarum populationum ecclesiam construi et clericum sibi ad eam presentari, qui predictorum populatorum curam gereret animarum et (a) sibi super pontificalibus responderet, post diutinas uero altercationes parcium, tandem per Dei gratiam talis inter eos amicabilis compositio intercessit, uidelicet quod abbas et conuentus de Fenalibus debent presentare episcopo capellanum ad ecclesiam Sancte Marie de Rumpecinlla, qui ab ipso episcopo prout iustum est in predictis populationibus curam recipiat animarum, cui et ecclesie supradicte ipse abbas et conuentus de prouentibus ipsius ecclesie debent comode prouidere, et residuum tam de mortuariis quam oblationibus quam decimis in usus suos conuertant abbas et monachi supradicti. Debent preterea dare episcopo Tudensi annuatim LXª solidos Legionensis monete nomine procurationis, que ratione uisitationis debetur, siue contingat eum uisitare ipsam ecclesiam siue non. Preterea debent dare de predicta ecclesia episcopo unam libram cere annuatim. Debent similiter dare archidiacono Tudensi, qui tenuerit Ualadares, decem solidos predicte monete nomine procurationis, que ratione uisitationis debetur, et unum sestarium de ceuada nomine tertie decimarum, siue contingat eum uisitare siue non. Et episcopus uel ecclesia siue archidiaconus Tudensis numquam debent amplius exigere ab ipsa ecclesia nomine predictorum, excepto duo solidos eiusdem monete quos debet dare capellanus annuatim eidem episcopo nomine cathedratici et uenire ad sinodum siue concilium tam episcopi quam archidiaconi, cum ipsos ea contigerit celebrare, et tam episcopo quam archidiacono sicut ceteri eiusdem episcopatus clerici obedire. Et si predicta moneta fuerit diminuta uel augmentata, debet fieri solutio secundum quod in presenti tempore dinoscitur ualere. Preterea, secundum consuetudinem episcopatus Tudensis, si parrochiani eiusdem ecclesie inerint ad alias parrochias laborare, debent ecclesie de Rumpecinlla medietatem decimarum illius laboris conferre; similiter si parrochiani aliarum ecclesiarum ad ipsam parrochiam uel eius terminos uenerint | [f. 101v] laborare, medietatem decimarum debent ad suas ecclesias deferre. Quod si peccatis exigentibus ipsam parrochiam, scilicet Rumpecinllam, sautum Menendi, Murciam uel totum cautum de Fenalibus per guerram siue occasione aliqua in uastitatem contigerit deuenire, ipsi monachi debent ipsas hereditates per se uel per suos, sicut potuerint, melius colere, predicta omnia episcopo uel ecclesie siue archidiano Tudensibus nichilominus persoluendo. Concedunt preterea idem episcopus et capitulum siue archidiaconus Tudenses abbati et conuentui de Fenalibus quod si abbas et conuentus de Fenalibus tenuerint dominas sui ordinis in capella de sauto Menendi, liceat ipsi abbati et conuentui tam in temporalibus quam in spiritualibus eis uel in celebratione misse et diuinorum per aliquem suum honestum monachum prouidere. Et si conuenerint parrochiani ipsius cauti ad eandem capellam ad percipiendum corpus Christi uel audiendum diuina, licitum sit ipsi monacho uel capellano supradicto eos recipere et eis in diuinis oficiis prouidere; similiter si in ecclesiam de Rumpecinllam ad succurrendum uenerit aliquis monachorum predicti monasterii, licitum sit ei tam in confessione quam in ceteris sacramentis ecclesiasticis ministrare. Preterea si contigerit episcopum uel archidiaconum ipsam ecclesiam uisitare et abbas et conuentus de Fenalibus ut capellanus eis aliquod seuicium fecerint preter supradicta, non debet eis pro foro aliquatenus imputari. Promittunt autem partes contra predictam compositionem numquam uenire. Si qua uero parcium contra predictam compositionem uenire temptauerit, alteri parti nomine pene mille aureos persoluat, compositione nichilominus semper in suo robore duratura. Et ut hec in posterum in dubium uenire non possint, presentem paginam per alphabetum diuisam, tam sigillorum episcopi et capituli Tudensis et Iohannis Garsie, canonici eiusdem, tenentis archidiaconatum de Ualadares, quam abbatis de Fenalibus, cum conuentus eiusdem sigillum proprium non habeat, partes fecerunt munimine roborari. Acta sunt hec in capitulo Tudensi per manus Gomecii Midi | [f. 102r] eiusdem episcopi publici notarii.
Qui presentes fuerunt:
Petrus Menedi decanus Tudensis, Egidius Petri archidiaconus Tudensis, Fernandus Iohanis archidiaconus Tudensis, Alfonsus Menendi prior Tudensis, Rudericus Iohanis canonicus Tudensis, Martinus Fernandi canonicus Tudensis, Martinus Menendi canonicus Tudensis, Petrus Pelagii canonicus Tudensis, Petrus Alfonsi canonicus Tudensis, Menendus Gomecii canonicus Tudensis testes.
Iohannes Garsie canonicus Tudensis testis, Nunus Petri canonicus Tudensis testis, Fernandus Suarii laicus testis, Dominicus Iohannis laicus testis, Petrus Pelagii laicus testis, Petrus Martini acolitus testis, Stephanus acolitus testis, Suerius Michaelis acolitus testis.
Petrus Gonsalui laicus testis, Iohannes Fernandi laicus testis et alii multi clerici et laici testes.