De Melgatio

[f. 103r] In Dei nomine. Innotescat presentibus et futuris per hoc scriptum perpetuo ualiturum quod cum coram nobis, L. episcopo, O. decano et A. archidiacono Auriensibus a domino papa iudicibus delegatis, causa inter monasterium de Feanes ex una parte et burgenses de Melgatio ex altera super heremitagio Sancte Marie de Grada et suis terminis uerteretur, nobis approbantibus, sic factum est inter eos, uidelicet quod ipsi burganses (a) restituerent heremitogium (b) supradictum iam dicto monasterium de Feanes cum tribus ortis. Super aliis uero terminis quos abbas et conuentus predicti monasterii exigebant ab eis, talem per Dei gratiam inierunt compositionem inter se, uidelicet quod ipsi burgenses dant iam dicto monasterio in Figueiredo quatuor casalia et medietatem unius casalis et quantum habent in monte de Reuoredo sicut diuidit per Asperon et quantum habent in monte de Goe et leyram | [f. 103v] de Lendeosa et preterea aureos Lª. Item abbas et conuentus monasterii sepedicti abrenunciant coram nobis predicte questioni et omni alii questioni si quam habebant aduersus ipsos burgenses. Et burgenses abrenunciant similiter isti questioni et omni ali questioni si quam habebant aduersus monasterium memoratum. Et ut ista compositio firmior habeatur, ad instantiam utriusque partis, sigillis nostris eam fecimus communiri. Facta carta apud Auriam per manum Iohannis Martini notarii, era Mª CCª Lª VIIIª, IIIIº kalendas marcii.

(a), (b) Sic.