De Prado

[f. 105r] In Dei nomine. Ego Pelagius Petri tibi Ruderico Muniz et uxor tue Marie Pelagii una cum monasterio de Fenalibus facio cartam uenditionis de mea hereditate quam habeo in Prado et in Mugueimis ex parte matris mee. Do uobis quantum habeo in supradictis locis tam in montibus quam in fontibus, intus et foris et cum omnibus suis plantatis, et dedistis mihi in precium LXª solidos et pro robore V solidos de bona monete Legionensi. Habeatis uos ipsam hereditatem et omnis uox uestra iure hereditario imperpetuum. Et si forte aliquis homo uenerit tam | [f. 105v] de mea parte quam de aliena qui hanc cartam frangere uoluerit, sit maledictus et quantum calumpniauerit tantum componat alteri parti in duplum et domino terre, uel cui uocem uestram dederitis, D solidos pectet, carta nichilominus in suo robore permanente. Facta carta sub era Mª CCª LXXXª Iª, mense maii, regnante in Legione et Castella rege domno Ferdinando, episcopo in Auria Laurentio, tenente terram Pelagio Arie, uicario regis Munio Fernandi, iudex Petro Fernandi de Uillanoua, maiordomus Menendus Petri. Ego Pelagius Petri hanc cartam roboro et confirmo.
Qui presentes fuerunt:
Rudericus Aluariz testis, Fernandus Martini testis, Petrus Paris testis, Martinus Martini testis.
Rudericus Petri testis, Gundisaluus Martini testis, Petrus Sancii testis, Pelagius Roderici qui notuit (signum).