De albergaria de Queigada

[f. 109r] In Dei nomine. Ego domna Maria Roderici una cum filia mea domna Stephadia damus in presenti et concedimus Sancte Marie de Fenalibus quantum habemus in albergaria que iacet super Chegada cum suis hereditatibus et cum omnibus suis terminis pro animabus nostris et pro animabus illorum et illarum qui ibi eam dederunt. Si euenerit ut supradicta albergaria aliquo tempore populetur uel requiratus, sicut fuit data prius, mandamus ut monasterium de Fenalibus sit semper intergatum de alia tanta hereditate in Marranchus per quantam hereditatem nos ibi habemus. Si quis ex nostra parte uel de extranea uenerit ut corrumpat hanc cartam, sit maledictus et cum Iuda, Domini traditore, in inferno dampnatus et domino terre pariat CC aureos et factum nostrum semper sit firmum et stabile. In Portugalia regnante rege Santio II°, in Brachara electus domnus Siluester, tenente terram domnus Rudericus Sancii, era Mª CCª LXª IXª.
Qui uiderunt et audierunt et presentes fuerunt:
Menendus Didaci monacus testis, Menendus abbatis testis, Garsias Lupiz testis.
Petrus Pelagii testis, Gundisaluus Iohanis testis, Petrus qui notuit testis (signum).