De Ferreiros

[f. 141r] In Dei nomine. Ego Ermigius Menendi de Doma et uxor mea Santia Munionis damus in presenti et concedimus monasterio Sancte Marie de Fenalibus pro animabus nostris et pro remissione peccatorum nostrorum totam hereditatem, quam comparauimus de Martino Alfonsi, in uilla de Ferrariis cum suis pertinenciis. Igitur de hac die habeat ipsum monasterium ipsam hereditatem in secula seculorum. Si aliquis homo uenerit ex parte nostra uel de extranea qui hanc donationem nostram frangere uoluerit, habeat nostram maledictionem et duplet hereditatem ipsam monasterio predicto et domino terre, aut cui uocem monasterii pulsauerit, pectet CC^os solidos et semper carta maneat in robore. Facta carta donationis sub era Mª CCª LXXª IIª, regnante in Legione et Castella domno Fernando, in sede Tudensi episcopo domno Stephano, tenente castellum Sancte Crucis domno Petro Manion. Ego Ermigius Menendi et uxor nostra Santia Muniz hanc kartam roboramus. Qui uiderunt et audierunt: conuentus de Fenalibus et multi alii.