[Bula Iusticie ordo]

Paschalis episcopus seruus seruorum Dei. Venerabili fratri Gundisaluo Mendoniensi episcopo satiutem et apostolicam benedictionem. Iusticie ordo efflagitat ut qui in ecclesia suis prepositis noluerint obedire, in subiectis suis mercedem inobedientie sorciantur. Sic primus humani generis parens conditori suo noluit obedire in se ipso, id est, in subiecto corpore, inobedientie rixam meruit inuenire. Sic et tu, uenerabilis frater, quid in subiectis tuis merearis agnoscis, quia obedientiam metropolitano tuo susceptis apostolice sedis litteris non solum denegasti, sed nos in ipso non es ueritus contempsisse. Super hoc etiam adiecisti uel adieis ut Dumiensem ecclesiam, que prope ipsius ciuitatis Bracharensis menia sita est, quam omnipotens Deus post multa iam tempora pristine dignitati restituit, tirannica usurpatione retineas, quodque grauius est et sacerdotali mod[er]atione indignius, seculari persone occupandam eamdem ecclesiam commisisti, ut eam contra metropolitanum tuum non iusticia, sed uiolentia tueatur. Vnde fraternitatem tuam monemus ut archiepiscopo tuo et eius metropoli debitam obedientiam reddere ne moreris et prefatam Dumensem ecclesiam in ipsius fratris nostri Geraldi Bracarensis archiepiscopi potestatem ac dispositionem, remota omni laicali usurpatione, restituas, saluis tibi et ecclesie tue ceteris antique parochie iustitis. Alioquin sedis apostolice senties indignationem et sententiam, quam in te sicut in contumacem metropolitanus tuus equitate dictante pertulerit, nos fauoris nostri robore confirmamus. Ipse enim loci situs Dumiense monasterium ad Bracarensem ecclesiam pertinere demonstrat. Datum Laterani [Kalendas] Aprilis.