[Bula et fratrum relatione]

Paschalis episcopus seruus seruorum Dei. Venerabili fratri Didaco Compostellano episcopo salutem et apostolicam benedictionem. Et fratrum relatione accepimus et gestorum ueterum lectione cognouimus, quoniam Fernandi regis filius Garsias, cum rogatus a Gallicie episcopis Braccarensem urbem restaurare disponeret, clericis Sancti Iacobi, qui predecessoris sui Ordonii regis donatione partem Braccare tunc desoiate susceperant, pro eadem par[te Cordarium monasterium] commutatione concessit. Post exiguum temporis idem Garsias a fratre Sancio captus Bracharem repa[ra]re non ualuit, sed ingruente dissidio regnum amisit. Sic Bracharensis ecclesia commutationem nouiter factam, breuiter possessam uiolenter amisit. Porro Sancti Iacobi episcopus seculari potentia nisus et Cordariam tenuit et Brachare portionem non iure pertenuit, que uidelicet pars Sancti Victoris et Sancti Fructuosi uocabulis nuncupatur. Nunc per omnipotentis Dei gratiam Bracarensi urbe in metropolitane dignitatis gloriam restituta, fraternitati tue mandamus, ut commutationis iure seruato partem illam Bracharensis urbis in iussu metropolitani debita caritate restituas. Nec enim decet ecclesias uel ecclesiasticos uiros huiusmodi dolis aut uiolentia se inuicem circumuenire. De certis, que in Bracarensi parrochia ecclesia Beati Iacobi fidelium quorumlibet donatione possidet, retento dominii iure, quod solum qui possederant dare potuerunt, cetera episcopalis iusticie omnia siue in clericorum ordinationibus atque iudiciis siue in decimis aliisue oblationibus eidem episcopo integra et quieta dimittas. Datum Laterani Kalendas Aprilis.