Karta uenditionis quam fecit Arias Arie ecclesie Bracarensi in Fatemias

In Dei nomine. Ego Arias Arias una pariter cum uxore mea nomine Maria kartam uenditionis et firmitatis facimus uobis domno Pelagio Bracarensi archiepiscopo et clericis ibi commorantibus de hereditate nostra propria quam habemus in uilla Fatemias et ipsa hereditas uenit mihi de patre meo Arias Alubiz et de matre mea Godma que comparauerunt eam per precium et cartas. Damus uobis ipsas hereditates deliberatas de totis calumpniis per ubi illas potueritis inuenire per suis locis et terminis antiquis et accepimus de uobis precium quinquaginta bracales tantum nobis bene complacuit et de precio apud uos non remansit in debitum pro dare, ita ut de hodie die et tempore de iuri nostro sit abrasa et in uestro dominio sit tradita atque confirmata. Habeatis illam firmiter et omnes successores uestri in perpetuum.
Facta karta uenditionis V Kalendas Martii Era M.^a C.^a LX.^a VI.^a. Ego Arias Arias et uxor mea in ac karta manus nostras roboramus.
Petrus ts., Pelagius ts., Arias ts., Rodericus ts., Aloitus conf., Fernandus conf.
Leouegildus notuit.