Testamentum Gunsalvi Menendi

[f. 15v] In nomine Patris et (a) Filii et Spiritus sancti, amen. Quoniam in hac vita quasi hospites sumus et nemini nostrum ultimam sui horam scire est datum, iccirco ego Gunsalvus Menendi, timens ne morte preocupatus ab hac vita intestatus recedam, iubeo facultates meas disponere, gratia auxiliante divina. Audivi enim Dominum nostrum per prophetam dicentem: «ve vobis qui copulatis domum ad domum et agrum agro copulatis; numquid vos soli habitabitis in terra?»; et beatus Iob: «dives cum dormierit nichil secum affert; aperit oculus et nichil inveniet». Hec et alia huiuscemodi documenta sepissime audiens, iussi facere kartam testamenti monasterio Sancti Salvatoris de Ecclesiola de ipsa mea hereditate quam habui in villa Castro et in ipsa quintana de illo Auteiro. Et fatio vobis cartam canonicis Sancti Salvatoris de Eclesiola similiter de illa mea hereditate de Vimaranes pro qua accepi a vobis in pretio LX^a morabitinos, tantum mihi placuit; et de illa quam habui in Ripas, videlicet duas quintas, pro qua simili modo accepi a vobis pretium videlicet unum obtimum pallium et unum par calligarum; ************ et de Ramir integro, pro quo dedistis mihi L morabitinos; et de ipso meo casale de Almeara pro quo accepi a vobis pretium XV morabitinos; tantum mihi conplacuit et pro dare nil remansit. Habeatis illas, prout sursum sonat, vos canonici Sancti Salvatoris et successores vestri firmiter in perpetuum temporibus seculorum, tam testatas [f. 16r] quam a me emptas. Si quis vero adversus hanc scripturam inrumpendam aut infringendam temere venire ausus fuerit tam de meis parentibus quam de extraneis, quisquis fuerit, quantum auferre vel minuere presumpserit tantum supradictis canonicis in duplum componat, et domino patrie aliud tantum et libram auri exsolvat; et qualiscumque persona fuerit, sit maledicta et excommunicata et cum Iuda traditore in profundo inferni demersa. Facta karta testamenti seu comparationis et firmitudinis mense augusti, era M^a. C^a. LXXX^a. IIII^a. Ego supradictus Gonsalvus Menendiz, qui illam iussi scribere, cum idoneis testibus confirmo et propria manu roboro. Qui presentes fuerunt: Menendus, ts; Petrus, ts; Didacus, ts. Erus notuit.